kili namako¹ li ken pana e namako tawa moku. jan mute li wawa e pilin uta pi moku ona kepeken kili ni.

kili namako li ken kule mute. ma ni la jan li moku e kili namako walo e kili namako pimeja. taso ona tu li kili sama. ni li ken tan seme? mi o pana e sona ni:

jan li wile kepeken kili namako tawa moku ona la ona li wile ante e kili ni. kili li lon kasi mama la ona li lili la ona li kule laso. ona li kama suli la ona li laso loje. jan li jo e kili lon tenpo ni: kili li suli ala li lili ala, kule kili li laso pi loje lili.

tenpo ni la jan li seli lili e kili kepeken telo seli kepeken tenpo lili taso. pini la jan li pana e kili tawa anpa suno. suno li weka e telo tan kili la kili li kama kili namako pimeja.

kili walo li kama tan nasin seme? a. ni li pona taso. jan li weka e selo pi kili namako la ona li kama jo e kiwen kili lili pi kili namako ni. nasin pali ante li sama la telo li weka tan ona la kili li kama kili namako walo.

kili namako pali li ken awen suli. ni la jan li kipisi² e kili ni la kili li kama sama kiwen lili. jan li pana e kiwen lili tawa moku la moku li kama pilin namako li pilin pona tawa uta.

taso o sona e ni: jan mute li ken ala moku mute e ni tan ni: pilin pi namako seli li ken nasa e jan mute. a a a.

taso ni li pona mute tawa mi.

nimi sin:

1. namako - jan li pana e ijo sin tawa moku la pilin moku li kama wawa la ijo ni li namako.

2. kipisi - jan li tu mute e ijo la ijo lili mute li kama lon. sama lili e nimi “pakala” taso ijo li pakala ala li kama lili taso.